هسه الحرامي منو !!!

الفرق بين (شطة القاضي) و (شطة غيرو) ح أتكلم بالدارجي ، أسمحو لي .. قبل البدايه : عندي صاحبي - أو أبوي - زي ما بقول ليهو ، كان شغال قاضي ، القاضي الواااااحد ده ، ولمن شاف ميزان العداله المايل في السودان نزل بقى محامي عادي .. ما بعدد ليكم صفاتو ولا أخلاقو ولا إنسانيتو ولا ح أقول إنو بينزل محامي دفاع عن كل مره أو معلم أو مظلوم بالمجان .. لكن بحكي موقف صغير جداً منو ، الساعه 2 صباحاً تلب عليهو حرامي في البيت .. حرامي تلب في بيت قاضي ... والقاضي مسكو متلبس .. قاضي وحرامي وجهاً لوجه .. إتخيلو شكل العقاب وشكل (الشطه) الجابا ليهو .. القاضي لقى الحرامي عمرو يقارب الـ 18 أو 19 ، مسكو من يدو وقال ليهو مشكلتك شنو ؟ الحرامي قال ليهو : أنا جيعان .. القاضي قال ليهو أنا ذاتي ما اتعشيت ، تعال نتعشى سوا .. وخلاهو في الديوان ومشى جاب ليهو عشا وجاب ليهو (شطه) مع العشاء طبعاً وبقو يتونسوا سوا ويضحكو وفرّش ليهو في الديوان ونام لحدي الصباح .. إنتهت القصه .. قصة قاضي ، قاااااااااااااضي كامل ، يعامل حرامي بالشكل ده .. الكلام ده ما قبل ألف سنه ، قبل سنتين بس أو أقل ، وشخصية القاضي دي موجوده لحدي الآن ومعانا في سودانا ده ، ربنا يطوّل في عمرهم التلاته (السودان والقاضي والحرامي) قبل النهايه : أنا ما شفت الفيديو طبعاً بتاع الحرامي العذبوهو بالشطه ، وما عندي رغبه أشوفو ،، لأنو الإنسانيه بتحرررررررم علينا مشاهد زي دي .. والفعل ده ما بشبه السودانيين بأي حال من الأحوال ، مهما كانت الجريمه .. في مليون من الحراميه (الصحي صحي) هم البستاهلو ، وبرضو ما بستاهلو الشطه ، في حاجه إسمها قضاء .. * أعتذر للفظ (حرامي) ، استخدمتو للمقارنه العكسيه فقط ( حرامي / قاضي) .... إنتهى .... هامش : (ما يقبّضو الباعوض ما يقبّضو الضبان الما بدور فِتّيش ما يصوّبو البارود تالا اب كلام غِشغيش الأرزقي ، السمسار إشمعنى نحن وليش ؟ إحنا الحراميه ، وللا البدسّو العيش ؟؟) حميد