عندك خُت .. ما عندك شيل

للمغتربين : تتذكرو ( عندك خُت .. ما عندك شيل ) ؟؟ تتذكرو كيف كنا بنبكي قدام التلفزيون ونحن في غربتنا ولا قادرين نخُت ولا قادرين نشيل !! تتذكرو كيف كنا حاسين بتقصيرنا ونحن بعيدين من ساحة القيادة .. وإنو الشباب الصغار كانوا بمشو للموت وصدورهم مكشفوفه وكانوا عُزّل من أي سلاح غير محبة الوطن وغير رغبتهم في التغيير !! متذكرين ( دودو ) ؟ متذكرين ضحكتو وهظارو مع الناس في ترس التفتيش !! إتخيّلو حسرة أمو لو الوطن المات عشانو ما قدرنا نبنيهو على مقاس أحلامو وأحلام كل الشهداء .. متذكرين ( عبد العظيم ) ؟؟؟ عارفين الوقت الكُنا فيهو نحن بنمشي المول ونلعب كوشتينه في بيت العزابة ونتفشخر بي موديلات التلفونات والعربات ، كان ( عبد العظيم ) براهو بس .. براهو .. ما معاهو غير يقينو بي وطنو وحُبو لي شعبو براهو كان واقف أعزل قدام البنادق والعساكر .. كان عارف نفسو ح يموت وعارف إنو ممكن مافي زول يجيب تارو ، لكن كان واثق إنو في شعب ح يصحى ويواصل مسيرتو ولو بعد مليون سنه . عبد العظيم و(صَحبِهِ) .. فجُّو لينا الدرب وقدّمو شبابهم ودمهم في سبيل رِفعة البلد دي .. متذكرين لمّن كلنا كُنا بنحرّش في الشباب عشان ما يزحّو من الترس ونحن منبطحين في سرايرنا الوثيرة وهم بي غادي ملاحقين من العساكر !!! متذكرين لمّن كانوا بسمعو كلامكم وبطيعو نداء البلد المشترك بينكم وبينهم !! متذكرين ( عباس فرح ) ؟؟؟ عباس المات واقق علي طولو ومات قدام الترس عشان الوراهو ما يخاف !! متذكرين ( وطن القيادة ) ؟؟؟ البِنيّات الكانت زغاريدن شرارة الخلاص !! والكنداكات الوقفن في خندق واحد مع الرجال عشان تشرق شمس البلد من جديد .. مُش كلنا كُنا بنقول فاتنا عرس السودان ؟؟؟ ومُش كُنا بنتمنى لحظة مشاركة توصّل صوتنا للسودان وتقول للثوار نحن معاكم !! الفرصة جات لحدي عندنا من جديد وربنا جاب لينا مواكب في منافينا عشان نقدر نعبر العبور البنحلم بيهو نحن .. ما العبور البحلمو بيهو الساسه .. جاتنا الفرصه عشان نرد الجميل للبلد .. وربنا قسم لينا إنو نشارك بأضعف إيمانا في الوقت الكان غيرنا بشارك بي دمّو عربون للتغيير وللوطن الجديد معادلة غير عادلة أكيد دم و روح في مقابل عُمله ورقيه زائله .. لكن برضو أحسن من غيابنا عن واجب الوطن .. مهما حوّلنا من مليارات الدولارات أو الريالات ، ده كلو ما بساوي قطرة دم واحدة من ( كشه ومحجوب ) . الدور دورنا عشان نكتب اسمنا في دفاتر التاريخ مع أولاد وبنات الوطن الغيورين عليهو .. حولو قروشكم بالبنك عشان نقدر نساهم في رجعة بلدنا البنحبو تاني لي حضن أولادو .. وعشان نقدر نرجع ليهو ونلقاهو زي ما بنتمنى .. حوّلو قروشكم عشان السودان وشعبو العظيم .. عشان دم الشهداء ما يضيع ساي .. وعشان نخُت طوبتنا في بناء البلد البنحبو . ( أدِّي الوطن ما أداكَ يَا أدُّو الحياه .. ويي ده الأهمْ ) حِمّيد #حول_قروشك_بالبنك

#bloggingtips #WixBlog